ខេត្តឧត្តរមានជ័យ: នៅព្រឹកថ្ងៃទី ១៧ ខែតុលា ឆ្នាំ២០២៤ កង កម្លាំងយោធាជួរមុខកម្ពុជា-ថៃ បានណាត់ជួបពិភ្សាគ្នាត្រង់ចំណុចដីចំការតាសុទ្ធ UA (៥៤៧១៥.៩៣៩៤៤ ) ស្ថិតក្នុង ភូមិចំបុីរួត សង្កាត់អូរស្មាច់ ក្រុង សំរោង ខេត្តឧត្តរមានជ័យ ។ លោកវរ:សេនីយ៍ឯក ឃួន ភារុណ មេបញ្ជាការកងការពារព្រំដែនគោកលេខ៤០២ បានប្រាប់បញ្ជាក់តាមទូរស័ព្ទថា : ភាគីកម្ពុជាមានចំនួន៣៥នាក់ ដឹកនាំដោយលោកវរ:សេនីយ៍ទោ ប្លង់ យូឡុង មេបញ្ជាការរងវរ:៧០២ និងថ្នាក់ដឹកនាំអាជ្ញាធររមូលដ្ឋាន ដោយមានលោក ឱក សាម៉េត អភិបាលរងក្រុងសំរោង ខេត្តឧត្តរមានជ័យ និងលោក មេភូមិរួតចំបុី តំណាងចៅសង្កាត់អូរស្មាច់ចូលរួមផងដែរ។ ចំណែកឯ ភាគីថៃមានយោធាឈុតខ្មៅចំនួន២៨នាក់ ដឹកនាំដោយលោកវរសេនីយ៍ឯក ធី ភើមផុន មេបញ្ជាការវរ:សេនាធំលេខ២៦ ។ កិច្ចពិភាក្សាផ្តោតលើការចុះត្រួតពិនិត្យចំការដំឡូងមីរបស់ប្រជាពលរដ្ឋ ដែលបង្កើនផលក្នុងភូមិសាស្ត្រមិនទាន់ច្បាស់លាស់ ។ លោក ឃួន ភារុណ បានបញ្ជាក់ថា : ខាងភាគីថៃចង់អោយប្រជាពលរដ្ឋខ្មែរយើងដកដំឡូងមីចេញពីតំបន់នោះ និង ព្រមចេញលុយសងថ្លៃដំណាំ ។ តែខាងភាគីខ្មែរ ស្នើសុំពេលវេលាទុកអោយប្រជាពលរដ្ឋអាស្រ័យផលសិនរហូតដល់ថ្ងៃទី២៨ខែមីនាឆ្នាំ២០២៤ ។ ភាគីទាំងពីរ ( កម្ពុជា-ថៃ ) បានឯកភាពគ្នា មិនអនុញ្ញាតិអោយប្រជាពលរដ្ឋដាំដំណាំលើដីតំបន់នោះជាបន្តទៀតឡើយ ដោយយករបាយការណ៍នៃកិច្ចពិភាក្សាគ្នានេះ ជំរាបជូនថ្នាក់ដឹកនាំខាងលើ រៀងខ្លួនៗ ដើម្បីពិនិត្យសម្រេច ទើបជូនដំណឹងនៅពេលក្រោយទៀត ។ សូមបញ្ជាក់ថា: ប្រជាពលរដ្ឋខ្មែរ ដែលអាស្រ័យផលលើដីក្នុងភូមិសាស្ត្រមិនច្បាស់លាស់ មានចំនួនជាង១០គ្រួសារ នេះបើតាមកាបញ្ជាក់ពីលោក ទីន មេភូមិ រួតចំបុី បានប្រាប់ ៕
